Bio

Un biaha, no mucho tempo pasa, mi a nace riba un isla encanta cu ainda, te dia di awe, nos ta yama Aruba.

Tabata bou luna yen, riba juni 3 di 1974, cu mi a bin na e mundo aki como Liliana Lorraine Erasmus.

 

Mi mayornan tabata yen di alegria cu nan prome yiu, pero pronto nan lo descubri cu nan dushi princesita no tabata exactamente e tipo pa shimis ros yen di payet.

 

En bes di hunga bisti bunita of cu popchi, mi tabata prefera di subi den palo y explora e mondi hunto cu mi ruman homber y primonan — tur mucha homber di mas salbahe cu tin (no laga e disfrasnan di payaso ey tuma bo haci). 

 

No semper tabata facil pa ta e unico mucha muher den tou. Mi mester a bira prueba bibo cu mucha muhe tambe por saca batata. Ta asina mi a bin descubri mi superpoder: haci kere! Nunca subestima e podernan di imaginacion.

Ideanan pa aventura mi tabata saca for di buki of mi ta inventa nan. Semper mi tabata fascina cu storia. Pesey mi a cuminsa crea mi propio versionnan, skirbiendo nan asta prome cu mi a siña con pa lesa y skirbi. Con? Asina ki:

(Un.. biaha... tabata... tin...)  

Ora mi tabata tin 6, mi a skirbi mi prome articulo pa corant di scol, tocante un accidente di avion. Mi a asta inclui algun imagen pinta na man. Poco despues mi mayornan a wordo yama na scol. E transicion di Aruba pa Hulanda mester tabata impacto fuerte pa mi, of asina nan di.

Cu 9, mi a gana mi prome premio y publicacion den Matinette, un revista local pa mucha cu su 'Carta Di Luna'. Mi no tabata ni sa cu mi tabata competiendo. Ta algun sugerencia pa articulo so mi tabata tin pa e editor. Ora mi maestra y cabesante a felicita mi dilanti henter mi klas, mi a sinti manera mi cabes lo dirti bay. Mi recompensa a fresca mi di biaha bek: un certificado regalo di 25 Florin

 

Un otro biaha, mi a dicidi di pone un anuncio den un revista popular pa hoben, sperando asina pa topa un amiga/o pa coresponde cu ne. En bes di un, mi a wordo bombardea cu 'penfriends' (bo ta korda eseynan, y e era di carta y stampia?) for di tur skina di mundo. E postbode a puntra su mes con un persona asina hoben (11) por posiblemente tin su mesun negoshi caba. Mi tabata ricibiendo shen y pico carta skirbi na man pa siman! 

 

 

Despues di añanan di sondeo di carera y alma (1992 - 2013), porfin mi a haya locual mi tabata buscando: mi pasion di berdad.

 

Mi a rebibi hopi recuerdo di mi infancia door di skirbi y ilustra poesia pa mucha den lenga materno Papiamento. Na 2003 mmi prome buki, ‘Rima Rond Di Aruba’ a wordo publica pa Cas Editorial Charuba.

 

Tabata tin un gran necesidad pa literatura original cu e muchanan local por a relata na dje. Mi a descubri un manera pa no solamente crea y comparti mas buki cu ta posibel, pero mas importante, pa encurasha e isla pa descubri e placer di lesamento. 

Prome cu mi a wordo publica, mi no tabata tin idea di kico esey tabata kiermen; bira un autora. Mi nunca a pensa riba bishita di scol ni presentacionnan y no tabata tin niun idea di e cantidadnan di mucha cu no tabata lesando, mucho menos e rasonnan pakico.  

Desde mi prome publicacion, mi a siña bastante tocante mi lesadornan y mi a bin descubri otro motivacionnan (no pa mi propio placer so) pa skirbi. 

Na 2004, mi amiganan (Indra Anthony-Pereira, Ilaina Franco Franka) y ami a inicia Fundacion Papiamente. Door di ofrece publicacionnan di calidad, organisando evento di lesamento y buki, campañan promocional y di concientisacion, e fundacion ta propone su mes pa trece mayornan, educadornan, muchanan, henter e isla mas serca di buki.

E coleccion di poesia ‘Rima Rond Di Aruba’ a conduci na un cantidad di publicacion esencial pa mucha riba mi isla, incluyendo ‘Mi Prome Buki Di ABC’ (Aruba su prome buki di alfabet), e prome Regalo di Festival di Buki Mucha ‘Hopus’, e serie di comedia na radio 'Nano E Enano', for di cual un buki pa scucha a wordo publica, un buki di cantica pa mucha cu su CD, plachi di storia di kamishibai pa tur e scolnan na Aruba.

 

Door di participa cu e Siman di Buki na Boneiro desde 2005, mi tabata por a comparti mi storianan, rima y rapnan cu e otro islanan ruman unda Papiamento/Papiamentu tambe ta wordo papia. 

Na 2007 mi a haci mi debut Hulandes cu e buki di prenchi 'Hopus', publica pa Uitgeverij Zwijsen como un Leesleeuw (serie di Leon Lesado pa tur e scolnan). Un aña despues, mi tabata celebrando e Kinderboekenweek (Siman Di Buki Pa Mucha) cu presentacionnan na e scol y librerianan tur rond di Hulanda.

 

Awe mi ta asina contento di por ta skirbiendo pa e muchanan di Hulanda y Belgica tambe. Mi a skirbi un cantidad di buki pa lesa riba nivel y pa mucha di diferente edad y abilidad, y tabata tin e placer pa traha cu ilustradornan increiblemente talentoso. 

 

'De Knijpkat' (E foks dynamo) tabata mi prome thriller-misterio pa muchanan cu no gusta lesa mucho, publica na 2012 pa Uitgeverij Delubas. Y tin mas na caminda. Check e lista di buki completo...

Internet y Medionan Social ta habri un mundo di oportunidad pa tanto hende, specialmente escritornan independiente. Esey mi a descubri na 2009, ora un revista pa den avion a aserca mi pa un trabou di skirbimento. E revista tabata busca un contributor Arubiano pa nan seccion di destinacion Caribense nobo (danki, website personal!), y aunke mi tabata un escritor sin Ingles como lenga materno y sin niun  experiencia cu skirbimento pa e mundo biahero, mi a bisa agredecidamente cu 'Si'. 

 

Pronto, - mientras mi tabata update mi profilnan y construyendo na mi presencia online - mas trabou di skirbimento a sigui drenta, for di periodismo investigativo te na e set up di un team di escritor pa un 'massive online gaming app' (app pa weganan online masivo) na Malta. Atrobe mi a wordo bombardea. E biaha aki, cu boshi posibilidadnan fabuloso. Pero mi no por a laga mi caracter impulsivo pasa mi cabes.

Mi trabou di blog tocante Aruba ta duna mi e chens pa siña y comparti mas over di mi tera. Mi kier nos bishitantenan saca e mihor for di nan estadia Caribense-hulandes. Duna nan tur e ins y outs cu ami lo desea di haya ora mi ta biahando pa un caminda. Planeando un keiro? Of, djis pa caweta? Check mi site 10BEST/USA TODAY Aruba

 

Na 2015 mi a bira e blogger di bienestar pa Manchebo Beach Resort & Spa. Un otro area inexplora cu mi a hinca mi mes aden, cu por cierto a resulta den un biahe hopi curativo. Y ainda mi ta explorando, como 

contribuidor pa ARUBA NIGHTS PUBLICATIONS, P&O Cruises su revista Moments... y ban spera p’e resto di mundo despues di esaki.

Si bo tin un proyecto di skirbimento interesante, tuma contacto cu mi libremente, mi lo encanta pa haya sa mas.

© 2020 Liliana Erasmus